Kakanyo ya go hloma Khansele ya baswa ya tša bokgabo e thoma go otlologa!

Limpopo Youth Arts Council- ye ke khansele yeo e ka bonwago ka mono probenseng ya Limpopo nakong yeo e sa fetšego pelo. Baswa bao ba tšerego maitapišo a bona ba a bea tiragatšong ya tša bokgabo gammogo le setšo, ba kopantšhitše di hlogo go netefatša gore khansele e a kgonagala. David Ramakgwakgwa ye ka sebele a lego moswa wa go tsenelela ka gare ga ditiragatšo tša bokgabo le setšo o re kakanyo ye ye hlwahlwa e tlile ka Komišene ya baswa ya Limpopo.

Morero mogolo wa khansele ye ke go tla go netefatša gore dinyakwa tša badiragatši ba tša bokgabo ka mono Limpopo di a lebelelwa ebile ditalente tša bona di tšwetšwa pele. “ Khansele ye e tlile gape goba yona gomang ka nna ya go kgobaketša badiragatši ba go swana le Direti, dibapadi tša sefala, bangwadi, babetli gammkogo le ba torowi. “Bontšhi bja baswa ba Limpopo ba nale talente ye kgolo re lebeletše mererong ya tša bokgabo, efela ka lebaka la gore ga go nale motho yoo a ba hlokometšego ditalente tša bona di feleletša di lahlega, ke ka lebaka leo re nyakago go dira khansele ya mohuta wo yeo e tlabego e lebeletše baswa feela” gwa realo Ramakgwakgwa ge a be a hlalosetša lešaba la badiragatši nakong ya ge go be go swerwe kopano.

Ramakgwakgwa go tšweleng pele ga gagwe o laeditše gore khansele ye e tlile go thoma dileteng tše hlano tša ka mono probenseng, gomme ka morago gwa hlongwa boetapele bja probense.