Moprofesara John Ruganda

Moprofesara John Ruganda

By Kgobalale Peter Moruthane

Maikemisetse a sereto:

Moprofesara John Ruganda obe a le mohlahli wa ka nakong yage ke le University ya Limpopo ngwaneng wa 2005-2006. O be ale mohlahli wa makgonthe’a kgodi’a kgokgo. A le mogwera wa nnete. Sereto ke se ngwadile lebaka ele go mo gopola, go mo leboga, go mo tlotla gammogo le gona go mo tumisa malebana le dilo ka moka tseo a di diretsego probense ya Limpopo gammogo le dinaga magae tse mmalwa go swana lebo Mohlaletse, Jane Furse gammogo le bo Mosina. Mokgalabje Ruganda o kgonne go ralala le dinaga tseo di badilwego ka moka lebaka ele go tsweletsa nyanyeng ditalente le mabokgoni a setso le bokgabo ao a utamilego ka gare ga metse yeo e utamilego. Ruganda o hlokagetse ka 08 December 2007 gomme a bolokwa letsatsing la 16 December 2008 ka nageng ya gabo ya Uganda. Sereto se se diragaditswe sefaleng letsatsing la bo 24 February 2008 nakong yage go be go dirilwe mokete wa segopotso sa gagwe ga mmogo le go keteka bophelo bja gagwe ka Univesithing ya Limpopo.

Sereto:

Moprofesara John Ruganda

E wele kakapa ya mokgalabje thobela;
Botse bo bonwe ke bo nonyana;
Phorogohlo le matswiokoko;
Thakga tsa melodi;
Barego goja ba fefera melomo.

E wele kakapa;
Bohloko bo kwele ke mobu;
Wa seloko kage manga o palegile;
Gee le megokgo e tsholla ke bo tshosi;
Badudi se welwa ke kakapa bosego.

E wele kakapa rabadia;
Wa koma tsa bokgabo;
Gomme badikana ba setse kgakanegong;
Ba nelwa ke mantsho leru legolo;
Se gagaba fase;
Ka go tsumula medu ya meswana le mejakwana.

E wele kakapa ratshatsha;
Konokono ngaka ya malwetsi a bongwadi le boreti;
Ge ele sebeba se paraletse;
Se swalalantse dithelele;
Seswalalantse dikgagara;
E lego o na mahlo a bo nkadingala.
Lehu la gago wene kakapa ya mokgalabje;
Ke legala leo le tlabotsego dipelo tsa bangwadi;
Ke legare leo le bekotsego ntlhana tsa pelo tsa bareti;
Ke ntlhana ya lerumo leo le gagotsego;
Mphapha wa pelo ya mmapadi wa sefala.

Wene kakapa mokgalabke tatago direto;
Wena kakapa rabadia wa koma tsa bokgabo;
Wene kakapa nkadingala;
Ratshatsha malwetsing a bongwadi;
Ke ra wene mokgalabje kakapa;
Konokono papading tsa sefala;
O modimo, o pheta ya thaga go bangwadi.

Lehono bo morwa motho;
Le bo morwedi’a motho;
Ka wene ba kgona go tsatsankela;
Ba kgona go sepela ba phulolotse maphego;
Bjalo ka nong kgolo;
Mankgodi’a lewa thabeng tsa Leolo.

Univesity ya Limpopo ka wene;
E lahlegetswe ke ratshatsha;
E lahlegetswe ke rabadia;
Nkgwete, konokono, tswene ra roto;
Rakopong elego magoboko.

Ke kgahlwa ke lenao la gago;
La mphaphathi la mebala bale;
Go bane mo o gatilego gona go a bonala;
Reikgantsha ka wene tatago rena;
Re go gopola ka matsatsi o hle.

Metlae ya gago ebe e se ya go palesa marama feela;
Efela ele thuto gare gare pelong tsa badika;
O re pheletse ka thuto;
Ga bjalo go setse rena gore re phele ya gago thuto;
Gee le bja gago bophelo;
Re tla bo leletsa meropa le mapapata letsatsi ka letsatsi.