SE GOGELA KOBONG

Ka a boreledi mantsu;

O mo fetotse monagano;

Ka leleme o mo fekeeditse,

O go rata, a go tshepa;

Tlhenkge wa mo dudisa faase;

Ka dimona-monane wa mo robadisa;

A robala bja matla gosa.

Goreng lehono o mmeela mabaka,

Goreng lehono o mo kgethela diaparo;

O mokgethela bagwera le ge e kaba mesepelo;

Diganong tsa gagwe go di gana, o tloga o di hlatsa;

Di a go galakela, ke Sekanama, nkhubetswana legaba la thaba;

Mohlagare o la o bego o mogoketsa ka ona, lehono ke meno a Kgosi ya diPhoofolo;

Ramariri Tau tatago lesoka.

O itira kgogo, mokoko o itseela le hlabile;

Wa lwa ntwa, o itebeletse o nnosi;

Morago wa iphumola molomo;

Wa nanoga ka lebelo, gomme tsa bosilo tsa go rona.

O reng o iphetosa legwaragwara wene tatago batho;

Wa bolaisa mosadi ka dingwatha-meratha;

Wa bolaisa baana tlala, o lebeletse bona bo ma lehwafeng.

O reng o iphetosa legwaragwara wene mmago batho;

Wa bolaisa monna tatago bana baga go ka dingwatha meratha;

Wa boa wa sotla bana bag ago ka lesata;

Wa ba hlokisa kotse ya bophelo ebago tlhokomelo ya setswadi.

A lehono matsatsi nna moreti ke bona dipshisamare;

Ga ke sa bona bophelo, bja maloba botala;

Bophelo e nola nxa-nxa ka ge re sesana basadi, kage re se sana bana;

A e sita le go se saba goba ga banna.

Seatla sela botala maloba se bego se tlosa tshego;

Lehono ke lerumo la Ntwa ya bo Shaka Zulu;

Ke Molamo wa bagologolo bo Kgosi Sekhukhune wa Thulare;

Molomo wola maloba bogologolo;

O bego a anega dinonwane, o hlaletsa baana;

Lehono ke tshupa o fehlisa mabele;

Lehono ke phehli e setse ninawa dilo tsa bo podile.

Ka molomo re rera thekiso ya baana;

Ka molomo re rera tlaiso ya basadi;

Ka molomo re a rogaka, tlaiso ya ba ya monagano,

Ka diatla tsa rena re roba molala;

Ka diatla tsa rena re kgamathela ka madi a masea;

Ra kgamathela ka madi a basadi barena.

A re somiseng leleme go aga, go e na le go agolla,

Re somise diatla go homotsa le go kgothatsa,

Go ena le go bolaya le go kwisa bohloko.

A re somiseng molomo go hlohleletsa khutso,

Go e na le go fehla mpherefere malameng a banna le basadi.

Bana barena a ebe mafotwana;

Re ba khurupetse ka diphego,

Basadi e be balekane re ba gokare ka dinako tsohle,

Banna e be balekani, re ba segise ka dinako tsohle.

Pula

Pula

Ya matloro-tloro ae tlorome;

E binabinele melala;

Gotšwa ka difate, ebe botala’a morogo;

Ya medupi e tlorome;

E karabetše mobu;

Didiba e be mantšha o tlogele;

Gomme gotšwa ka difate;

Ebe mokhora wa lehlabula;

Dimpa e be mateku-teku;

Go sepela e be go tekola marago.

Ga e tšhologe mašumane a bine matlampule;

Ge e khula khubedu e be magapu;

Botala mašemo ebe dintsho;

Gomme ge le dikela;

Dimpa di tlale maraka.

Tšhologa wene pula;

Wene megokgo ya lethabo;

Ke ra wene sešego sa mokhora,

Ba a ikokobetša bana ba Thulare;

Ba re gata ka boya;

Wene tlou tona ya bošego;

Mošemane wa menatla.

Ba re tlaa o tswaletse molomo;

O tle le disegiša baeng,

Ba re se tsopule molomo;

Se befiše sefahlego;

Go bane wa dira bjalo;

Ge o etšwa ka difate;

Re tla lla sa ijoo;

Ra itswara mahlaa.

Pula..pula..

Tlaa ga gešu;

O tliše lekepe-kepe;

O tliše le ema-ema;

O tliše mokhora;

Mabele re tlatše dišego;

Re bolae ke segošane;

Dinawa, re bolae ke madupa.