Ga ke go tsebe

O reng o nkgaroša matswalo;
O reng o tsena ka bogare;
Bophelo bjaka bja goja koto;
Ka a mabedi matšatši o fihlile;
Wa tupiša lerole;
Wa be wa tsoša tupišani.

O fehlile mpherefere, wene phehli;
O mphehlile maikutlo;
Ka leleme wa gagola;
Ka molomo wa budulela;
Wa ntlogela ke itswere molomo;
Ke gakanegile, ke itswere lehlaa.

Gotšwa gona o tšwa kae wene moeti;
Ga ke go tsebe ele ruri;
Efela ka dipolelo, ke a kwa gore o moeti;
Ga se wa tlela sa ruri;
Legano la gago, ke la khwephane;
Nepo ya gago ke ya lehototo.

Ka mahlapa, o ntlhapaotše;
Wa ntšola lekgeswa;
Ka šala ke lekeleditše;
Pele ga gagwe ka gakanega;
Ka ponya kabe ka ponyologa;
Thogako ka e rwala ka magetla, ka imelwa.

O nthogaketše lefeela;
Ka ge o sena tlhompho;
Ga se wa nyaka go ntlhompha;
Goba go hlompha yena o rego o a morata;
Lehono ke rena ba;
Nna le yena re hlolana ka diolo;
Ka lebaka la gago.

Efela ke a tseba gore o moeti;
Dinao tša gago di nkga tsela;
Ka moso ge a lla;
O tlile go llela go nna;
Gomme ka mo phumola megokgo.

O be a iphora

A matala maaka o be a ipotša;
Ka dihlaa a ikaketša;
Gomme pelo e holofela di šele;
Kgafetšakgafetša a ipea pelwana tšhwana;
Ke wa mathomo wa go raga lepai mesong;
O tsoša nonyana matswiokoko;
Bothakga nonyana tša mebala.

Ba ile ge ba mmotša,Ba mo aketša, ka dihlaa,
Bare ngwanana o se babola;
Bare o seetša leswiswing;
A tšea ka tše pedi, a kgolwa;
A itebelela, a ipotša, a kgolwa;
A be a iphora.

O be a re ge a feta go lla melodi ya bo thaga,
Masogwana a sirela;
A bogale, a gala gala a mmotša;
A re ngwanana, o se babola, o se noinoi, se momothela;
Sona sematsatsa, sebaibai.

Ee, ke nnete;
Ba be a ba bolela ba mmona;
E le ngwana wa sebopego;
Yo masogana a kgotsofalago ka go mmona feela;
Ele Baby wa Dikoti Marameng;
Baby wa disegiša baeng.

Ge ele bafahluši;
O be a ba hlakantšha hlogo;
A kitimiša madi a bona ka nnete;
Bare ge baeme bare ke a ruta, ba thothomela, ba roromela;
Bile ba felelwa ke ditaba.

Nna ke a itheta kage lehono kele fa;
Ke reta sereto;
Ke mogopotše.

Ke ithatela maitswaro a ka;
Go bane ge gobe gose bjalo;
Lenna bjalo ka bagwera baka;
Nkabe ke iketše molete mohlaela thupa.

Go swana le yena; Lenna ke ile ka bitšwa ka maina;
Ke rwesitšwe maina, a inkimela ke imelwa;
Ba mpitša Bary bagwera baka;
Ba mpitsa Mapeka-Panzi;Bare ke Bary ke a Baiza;
Bare gake Sheshe, ke tshaba Bandwana.

Naa bja bona bohlale boba fihlisitše kae lehono?
Ba ragile Lepai, ba molete mohlaela thupa, ke bagologolo;
E ba foforile melomo ba šala ba homotse, kokwana-hloko,
Ya ba ripa maoto ba kanamiswa.

Ge ele nna lehono;Ke a ba reta;
Ke reta ke ija koto;
Ke reta, ka go ruta moloko wa bjalo;
Ebile ke ikhweleditše;
Mmaerobela waka ebago Sophie.